မိတ္တီလာတပ်နယ်အတွင်း မတ်လ ၂၈ ရက်နေ့က လှုပ်ခတ်ခဲ့သော ငလျင်ကြောင့် စစ်တပ်ဘက်မှ အရာရှိနှင့် တပ်သားများ အများအပြား သေဆုံးခဲ့ကြောင်း တပ်အသိုင်းအဝိုင်းမှ သတင်းရရှိသည်။ အမှတ် ၉၉ ခြေမြန်တပ်မဌာနချုပ်တွင် တပ်ရင်းများမှ တာဝန်ရှိသူများ အစည်းအဝေးပြုလုပ်နေစဉ် အစည်းအဝေးခန်းမဆောင် ပြိုကျမှုကြောင့် အနည်းဆုံး လူ ၂၀ ကျော် သေဆုံးခဲ့ကြောင်း အတည်ပြုနိုင်ခဲ့သည်။ အထူးသဖြင့် အမှတ် ၄၁၈ တပ်ရင်းမှ အရာရှိများနှင့် တပ်ဖွဲ့ဝင်များ သေဆုံးခဲ့ကြောင်း သိရသော်လည်း အတိအကျ အရေအတွက်ကို မသိရှိရသေးပေ။
ထို့အပြင် မိတ္တီလာမြို့တွင် အခြေစိုက်သော အမှတ် ၁ တပ်မတော်အကြီးစားစက်ရုံ (တကစ ၁) တွင်လည်း ငလျင်ဒဏ်ကြောင့် စက်ရုံအဆောက်အအုံများ ပြိုကျပျက်စီးခဲ့ပြီး လူသေဆုံးမှုများ ရှိခဲ့ကြောင်း သိရှိရသည်။ အဆိုပါစက်ရုံသည် စစ်တပ်အတွက် စစ်သုံးကားများနှင့် သံချပ်ကာယာဉ်များကို အဓိကထုတ်လုပ်နေသော စက်ရုံတစ်ခုဖြစ်သည်။ သို့သော် သေဆုံးသူ အရေအတွက်ကို စစ်တပ်ဘက်မှ ထိန်ချန်ထားသဖြင့် အတိအကျ မသိရှိရသေးပေ။
နေပြည်တော် ဇေယျာသီရိမြို့နယ်ရှိ စစ်တပ်ပိုင် စစ်ရုံးတွင်လည်း အဆောက်အအုံများစွာ ပြိုကျပျက်စီးခဲ့ပြီး အနည်းဆုံး အရာရှိနှင့် စစ်သား ၁၀၀ ဝန်းကျင် သေဆုံးနိုင်ကြောင်း တပ်တွင်းသတင်းရင်းမြစ်များက အတည်ပြုပြောကြားခဲ့သည်။ ငလျင်လှုပ်ခတ်စဉ် အချိန်သည် ရုံးချိန်အတွင်းဖြစ်နေသဖြင့် အဆောက်အအုံအတွင်း လူအများအပြား ရှိနေခဲ့ကြောင်းလည်း သိရှိရသည်။ ယခုအခါ ကယ်ဆယ်ရေးလုပ်ငန်းများကို ဆက်လက်ဆောင်ရွက်နေဆဲဖြစ်ပြီး သေဆုံးသူအရေအတွက် ပိုမိုများပြားလာနိုင်ကြောင်း ခန့်မှန်းရသည်။
